مشاهد من الحياة

قصة كريم

كريم 19 عام , تلميذ , مراكش


كريم, أول ما كانسمعو هاد السمية كاتطيح لينا فلبال صورة ديال شي دري زوين, ولد باباه, ضريف و بوكو لعاقة.. (غني) و ولد عائلة


و كريم فعلا مزهار, و سعيد و بيخير و على خير.. ولكن قصة كريم فشكل! نادرا فاش كاتوقع.. بكل بساطة حيث اللي لاباس عليهوم فالمغرب قلال و الطبقة الكادحة هما الكثار

كيف ما كايقولو.. كريم تزاد و فمو معلقة ديال الذهب ديزوي كارا (18 قيراط) و علاش؟

حيث ماعمرو بقا بالجوع

ماعمرو لبس حوايج مقطعين اولا مخيطين بزيگزاگ ! ماعمرو لبس حتا حوايج فايت مصبنين

ماعمرو دوز كونجي فالمغرب

ماعمرو" ضرب" البصارة و العدس و اللوبية البيضا وبوكاديوس

ماعمرو ﻠﻌﺏ فالغيس.. ماعمرو دخل للدار مجرتل

ماعمرو مشا من الدار للمدرسة على رجليه.. ماعمر ﺤﮓر عليه الأستاذ اولا قال ليه جيب شي بطاطا من داركوم نديرو بيها درس

هادي هي حياة كريم.. ولد عائلة من أرقى العائلات المراكشية.. أصولو شرقية و ثقافتو غربية

المغرب بالنسبة ليه
بلاد عايش فيها لا أقل ولا أكثر حارﯕ فيها ولكن بالأوراق

العربية بالنسبة ليه لغة قديمة و عيانة.. و مابقى حد كايهضر بيها فالمغرب ماعدا ابراهيم الشيفور و بوشعيب الجارديني و دادا ﺍﻠﺴﻌﺩﻴﺔ وعلي بابا حتا هوا

كريم ماعمرو تفرج فداكشي ديال الدوزيم و الإتم و داك التخربيق ديال الرابعة و العاشرة و داك اﻠﺳﭘيد كله.. المرﺒﻴﺔ ديالو ﺍﻠﯕاورية مانعة عليه دوك التفاهات حيت إيلا مشا حتا تفرج فيهم تربيتها مشات كلها فالزيرو! التلفزيون ديال كريم هوفوكس كيدز, كانال جي, كارتوون نيتوورك

ف فيلا قد السخط تربى كريم و كبر.. كبر على مبادئ "حداثية" و على ثقافة غربية علمانية.. تعلم لغات أجنبية و عادات أمريكية .. الله يلعنها تربية

باباه الحاج مصطفى.. لي حج 9 مرات و مشى العمرة 35 مرة.. ماشي باش يغسل الذنوب ولكن باش تولي سميتو الحاج مصطفى ماشي السي مصطفى

رجل الأعمال المراكشي العظيم, مول المشاريع العملاقة, والشركات المعروفة.. إينا فنادق, إينا أراضي, إينا عقارات, إينا استثمارات.. الله أكبر! مازﯕل حتى ضومين! خدام فكلشي.. و حتى إيلا جاب الله شي أفير ديال الحشيش مضمونة كايميزي فيها.. الحرام و الفساد و الرشوة و ماجاورهما بالنسبة ليه غير تخربيق ديال بوزبال.. و بطبيعة الحال رجل المال و الأعمال هو سياسي محنك.. ربا الحناك واش من حناك من نهار شرا..بغيت نقول.. ربح مقعد فالبرلمان


ـ الحاج ! لاباس عليك؟

ـ ها ها ها! اللي عندو صحتو و فلوسو يحمد الله

ـ و اللي ماﻋﻨﺪوش؟

ـ أش بغينا بالسياسة عاوتاني؟

ـ إيوا نتا راجل سياسة السي الحاج

ـ أنا راجل مصالح كانوقف مع الرابحة

ـ و اش خبار السي كريم؟

ـ ما خاصو خير.. يالله صيفتو لفرنسا مع اخته و المربية ديالهم باش تساريهوم

ـ و مامشيتيش معاهم؟

ـ و شكون خلاك؟ هاد لي زافير إيلا خليتيهوم يخليوك و يخليو دار بوك هاهاها


أم كريم, الحاجة كلثوم ولات مسكينة مبلية بالإستيتيك.. كل شهر كاتمشي لباريس تعمل عملية ديال التجميل.. تجبد بيها الكمارة شويا بالليفتين باش تنقص عامين من عمرها..!! سبحان الله

ـ الحاجة! كيداير ولدك كريم؟

ـ لاباس عليه

ـ اش كايعاود؟

ـ و شكون شافو؟ مسكين ولدي.. والله ماكايبقى ليا وقت باش نشوفو و لكن مدام بورفي قايمة بالواجب و مهلية فيه

ـ و زعما ما خاصو والو؟

ـ خاصو؟ إيوا هاد الكلمة ماكاتقالش عندنا فالعائلة


هكذا حياة كريم, هاكدا دايرة علاقتو ب واليديه.. باباه بالنسبة ليه واحد بندام عايش معاهم فالدار.. كايتلاقا أولا كايتساطح معاه بعض المرات.. هو سبابو حتا تزاد ف هاد الدنيا.. سي نورمال كايشبه ليه.. ولكن نسى آخر مره فاش تسالم معاه و ماعمرو عقل على راسو باسو أولا عنقو

أما ماماه, حاضرة غائبة!! عقلها مشتت بين الأيروبيك و الإستيتيك و مواد الكوسميتيك.. بالنسبه ليه هي المرأة اللي ولداتو على حساب ما عاودو ليه.. الحنان و العطف هادو من اختصاص دادا السعدية و مدام بورفي ملي كاتكون ناشطة اولا ضاربة كويسات

كريم عندو أخت.. عزيزة عليه واخا صوبيصة.. سميتها سارة, و فالكتب ديالها كاتكتب ساراه باللهجة الأمريكية

ـ سارة لاباس عليك؟

Oué cool –

ـ مالك ياك لاباس؟

Un peu oué.. chui un peu en colère-

علاش؟

C'est à casue de mon ptit ami Ayman.. enfin c'est mon ex maintenant.

ـ مالو؟

Conard ! Il m'a trahie avec Douja ma meilleure amie.. je les deteste tous ! f...-

ـ و دابا

ـ Beh rien.. j'ai un rancart avec Salim mon copain.. c'est un beau gosse, il m'plait beaucoup, je sens un coup de foudre arriver !!

هادشي لي كايهمها.. الخروج و السهرات و النشاط والعشاق و الأصحاب و الأصدقاء و المعجبين.. والإحتياطيين ...معارفها مرتبين بدرجات..  عالاااااااااااااااام عند سارة


أما داكشي ديال الحلال و الحرام و الحسنات و السيئات ما بينها و بينو إلا التيساااااااااااااااع الحياة ضحك و لعب و نشاط 

هادي هي عائلة كريم, عائلة ممسوخة الله يستر

الإنسان إبن بيئته, وكريم ماخرجش على هاد القاعدة.. كان طبيعي يعيش بنمط لي عاشت عليه عائلته.. وكان عادي حتى هو ياخد الحياة ببساطة و مايصدعش راسو بمسائل خاوية ديال الدين والحياة

هكذا داز كريم من مرحلة الطفولة اللي تحرم فيها من حنان الأم و عطف الأب و دور الأخت

كريم كبر و ولى شاب..دخل للثانوية ديال البعثة الفرنسية.. بطبيعة الحال

دوز مرحلة الطفولة ووصل للمراهقة.. وآشمن مراهقة.. فورست كلاص! حرية مطلقة..واو.. العز.... الخطر

فالليسي فرونسي تعلم كريم الإنجليزية و و الإسبانية واﻠﯕارو و البيرة والحشيش و الإكسطازي و تعلم يبسل على  لبنات واخو مامحتاجش لداكشي.. بوﯕوس و ملعق 

مع الوقت ولى كريم جسد بلا روح.. إنسان بارد, مادي, ميت العواطف, متحجر القلب.. همه المتعة و اللعب و الفساد.. وا أسفاه على الشباب

فاقد الشيء لا يعطي

و فواحد النهار

كريم كان سهران فواحد لابواط.. الزدحة ديال سامدي سوار كيما لعادة.. ولكن لي ماشي كيما لعادة هو كريم.. خرج بكري ﻠﻴﻭم و خلا لحيحة عاد غادي تبدا.. عاد غادي يفتحو قرعة ديال لويسكي.. عاد غادي يعكلو جوان.. عاد غادي يضربو 2 حبات ديال ليكسطازي.. ولكن داكشي كامل ماحلاش ل كريم فديك الليلة.. عياو معاه صحابو و صحاباتو وديك الجماعة كاملة لي كايسهرو معاه و كايلحسو ليه لكاﭙﺔ باش يخلص عليهوم شي تورني.. والو!! ناض و ﯕاليهوم تشاو و خرج.. دق على الشيفور فالزاج ديال الطوموبيل باش يحل ليه لباب.. حتى هو مافهمش علاش كريم رجع بكري اليوم

وصل كريم للدار.. طلع للبيت ديالو.. شعل لاشين و دار سي دي ديال نيرﭬانا و جبد لبواطا ديال لحشيش باش يفتخ شي جوان.. يالله غادي يدير بلاي هو يسمع صوت جاي من بلاصة أخرى

خرج من بيتو.. عاود سمع داك الصوت

ـ سي كي؟

ـ.........

ـ شكون الي هنا؟

ـ .........

ـ سي توا سارا

ـ..........

C’est qui merde ! –

ـ.............

ماحدو كايقرب من لبيت ديال ختو و الصوت كايتزاد.. هو يحل الباب


!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

لقا ختو سارة مع واحد و فبيتها و فدارهم.. هادي لي ماكانتش في البال.. هادي لي ماعمرو كان يتوقعها

saloppe !! –

- مالك نتا qu’est ce qu’il ya ? T’es malade ou quoi ?-

Dans ta chambre ? à la maison ??? t’es une vrai salope toi !!-

Ecoute gros naz, l'autre jour quand maman était en Espagne papa est venu à 4h du mat- avec sa maîtresse.. j'ai tout vu ! et j’ai fais un deal avec lui .. Tu pige ? je peux faire ce que je veux alors.. yalla casse toi bordel..

كريم تصدم صدمة العمر.. كلشي إلا ختو! كانت هي آخر إنسان نقي كايبان ليه فهاد الدنيا.. واخا كان عارفها حتى هي خارجة الطريق ولكن كان حاسبها كاتمتع بحياتها بحالو..و ماشي لدرجة تدخل واحد معاها فالدار.. و لدرجة تتفق هي و باباها باش كل واحد يسكت على الآخر و يخبي فضايحو.. كريم براسو ماعمرو قدر يديرها!

الدم الشرقي مازال فعروقو.. وحبة من الرجولة مازال فداتو.. وذرة من الغيرة على الشرف تحركات فيه أخيرا

رجع لبيتو.. والزلزال تحرك فجسمو.. وحس بشي حاجة كاتضرو فقلبو.. حس بصداع فدماغو.. حس بالنار كاتجري فعروقو

كانت هاد الحادثة نقطة تحول فحياة كريم

وقف قدام المراية الكبيرة لي فبيتو و بدا كايشوف فراسو.. و بدا كايرد فالسينتة للور.. كيف كان و كيف و ولى بكثرة السهر والحشيش والسكرة.. تفكر الصغر ديالو.. تفكر باه و امو.. تفكر كل حاجة خايبة دارها فحياتو.. و نزلو جوج دمعات من عينو.. دار كايشوف فبيتو.. بحال الجوطية ولى..ليلو ولى نهار و نهارو ليل.. أيامو كلها بحال بحال.. ماعمرو حس بشي عيد أولا شي مناسبة.. عمرو ماحس بالناس لي ضايرين بيه.. و شكون هوا؟ وعلاش عايش؟ وشنو كايدير فهاد الدنيا؟ وعلاش هادشي كامل؟ آش هاد الحالة يا ربي؟ آش هاد الحياة؟

و بدا كايبكي كريم

كايبكي

بحال شي دري صغير.. كريم مابكاش فصغرو حيث كان كلشي موفر ليه.. ولكن اليوم كايبكي حيث حتى حاجة ما بقات ليه.. كلشي ضاع بالنسبة ليه.. بكا كريم و بقا كايبكي.. على حياتو و على عائلتو.. شي حاجة فالداخل ديالو قالت ليه باللي هاد الطريق لي شاد ماشي هي هاديك.. هادي طريق المشية بلا رجعة

مابقا عارف مسكين ما يدير.. مابقا عارف لا مايقدم والا ما يوخر.. ماعرفش شنو يدير ديك الساعة.. تلف مسكين! بقا واقف اكثر من ساعة وسط بيتو

فرمشة عين قاليه راسو يخرج.. و خرج.. فنص الليل.. فالبرد.. و بدا كايجري.. كايجري.. كايجري ماعارفش فين و علاش ولكن بدا كايجري.. ضرب مسافة طويلة حتا بعد بكيلومترات على دارهم.. بحال إيلا بغا يبعد على داك الجحيم لي عايش فيه و داك الجو الفاسد لي كبر فيه

و بقا هاكداك بحال الهربان حتى عيا و سخف و وقف.. و كانت ديك الساعة الخامسة ديال الصباح.. كريم مسكين ماعرف راسو فين وصل.. بدا كايدور و كايشوف شنو هاد البلاصة.. حتا بانت ليه واحد البناية كبيرة.. وسمع واحد الصوت عظيم..


حي على الصلاة حي على الفلاح

الصلاة خير من النوم

الله أكبر.. الله أكبر

لا إله إلا الله



ـ هادا صاوت الآذان.. وي! جو كوني.. ديال هادوك ناس لي تايصليو

بقا واقف قدام المسجد كايسمع الآذان و كايشوف فالصومعة و الأضواء ديالها بحال إيلا أول مرة كايشوفها! و ارتاح كريم.. ماعمرو فحياتو حس بالراحة بحال هادي! كأنو طاير فالسما.. خداه صوت الآذان وسافر بيه بعيد.. نساه مشاكله ونساه المصيبة لي خلا فدارهم.. حتى وقف حداه واحد الراجل

ـ آش تادير أ ولدي هنا؟

ـ أه؟ .. أنا؟ والو!.. جو.. ماعرفت.. ج نسي با

ـ واش تلفتي أ ولدي؟ قدك ماشي ديال التلفة

ـ نو.. ج سي.. أنا خرجت.. هربت.. والله جي مال.. عييت

ـ شوف خلي هاد الهضرة من بعد.. موضي بعدا؟

ـ كيفاش؟

ـ واش موضي باش تصلي؟

ـ جي جامي في سا! ماعمرني صليت

ـ لا حول ولاقوة إلا بالله .. تجي معايا نعلمك توضى و تصلي؟

ـ ماتانعرفش

ـ غدي تعلم كلشي أ ولدي.. النبي صلى الله عليه و سلم كان أمي و بجهد الله ولى رسول الله و خير خلق الله

ـ واخا


دخل كريم مع داك الراجل للجامع

داه لبلاصة الوضوء.. علمو يتوضا و من بعد دخل معاه للجامع.. أول مرة كايدخل فيه كريم للجامع

ـ شوف أ ولدي أنا ماعرفتش علاش ماكاتعرفش تصلي و ماعمرك صليتي ولكن غادي نعلمك كيفاش تصلي إن شاء الله تافقنا؟

ـ داكور مسيو

ـ حاول تتكلم بالعربية أولدي راها لغة القرآن و سعداتنا بيها

ـ واخا ا سيدي


بدات الصلاة.. وقف كريم لأول مرة قدام الكريم ذو الجلال والإكرام.. إحساس غريب حس به كريم.. حس بالحرارة فداتو واخا البرد وماكانش لابس مزيان.. دفء إلهي نساه الدنيا و مافيها.. حس بالحب.. أول حب فحياتو.. حس كأنو إنسان جديد.. كأنو يالله تزاد.. كلمات القرآن كانت عليه بحال الدوا.. ماحدو كايسمع القرآن ماحد قلبو كايزيد يطمئن.. !! سبحان الله

"إنك لن تهدي من أحببت, ولكن الله يهدي من يشاء"


صدق الله العظيم


وهكذا فظرف ساعة ديال الوقت تبدلات حياة كريم و تقلبات رأسا على عقب

بقا كريم مع داك الرجل حتى 9 ديال الصباح.. علمو الصلاة و حفظو شي سور قصيرة من القرآن, وعلمو أركان الإسلام و الإيمان.. بكل سهولة و تلقائية.. ودار معاه موعد باش يزيد يعلمو داكشي لي ماعلموش ليه فالدار و المدرسة و حتى المجتمع

ملي رجع كريم لدارهم أول حاجة دار هيا قلب بيتو سفاها على علاها! حول بيتو من غار شيطاني لبيت ديال إنسان عادي

و دازت أيام..تغير كريم بزاف.. و حتا واحد ماتقبل هاد التغيير.. والنتيجة فقد صحابو كلهم.. و عائلتو ولات خايفة منو.. واخا ولى إنسان عادي!! ولكن الخير ماعمرو يتلاقا مع الشر

الحاج مصطفى والحاجة كلثوم ماعرفو باش تبلاو! و هادشي لي وقع لكريم ولى سبب باش يتلاقاو كل نهار فالدار ! سبحان الله

ـ الحاج !! كريم ضاع منا ! شفتي كيف ولى؟ تايعاملني بحال إيلا أول مرة كايشوفني! أ ويلي ولى تايهضر معايا بالعربية

ـ نتي السبب! واش أعباد الله النهار و ماطال ونتي خارجة و مخلية هاد الولد عامل مابغا.. نتي سبابو حتى ولى هاكدا

ـ ماحشمتيش؟ أنا بعدا كانشوفو فالليل وكانطل عليه ملي كاينعس! أما نتا فين عمرك شفتيه أولا جلستي معاه؟ كل نهار داخل مع الرابعة ديال الصباح و خارج فنص النهار.. تقدر تقول ليا إمتى آخر مرة شفتيه؟

ـ أنا راه خفت غير لا يكونو دوك الإخوانيين ضحكو عليه و كلاو ليه مخو..بحال والو يولي يسرق ليا الفلوس و يديهم ليهم

ـ هادشي فاش تاتخمم غير لفلوس؟ أما ولدك لهلا يرضو ياك

ـ راك غير كاتدبزي و ماعارفة والو! راه إيلا مشاو الناس حتى عرفو باللي ولدي ولى مع الإرهابيين مشيت فحالي! غادي يجريو عليا من غرفة التجارة والمجلس الجماعي.. وماشي بعيد يجريو عليا من الحزب و يمشي ليا المقعد ديال البرلمان.. و ديك الساعة الإفلاس مافيهاش!! لا لا هادشي خاصني نشوف ليه حل

ولكن

الخير ماتيتلاقاش مع الشر

من بعد ما رجع كريم لطريق الحق .. ومن بعد ما ولى إنسان مثالي.. من بعد ماتغيرات حياتو و ولى كايصلي ويزكي و يصوم.. وولا مجتهد فدراستو.. القدر كان مخبي ليه حاجة ماكانتش فالحسبان

واحد النهار مرض كريم

هزوه للمصحة باش يدوزو ليه, و دارو ليه التحاليل.. وشافو الطبيب وقال ليه باللي كلشي مزيان غير ضربو البرد و باللي خاصو يرجع غدا باش يكمل شي تحاليل.. و فعلا رجع كريم فالغد و دار تحاليل اخرين و قال ليه الطبيب باللي كلشي مزيان و خاصو يتبع مزيان الدواء اللي خرج ليه.. ولكن ملي خرج كريم ومشا لدارهوم , الطبيب اتصل بالحاج مصطفى وطلب منو باش يجي عندو فأسرع وقت.. و جا عندو الحاج

ـ سيد الحاج.. بغيت نهضر معاك على ولدك كريم

ـ ياك لاباس؟ ياكما دار معاك شي حاجة أولا قال ليك شي حاجة.. ها العار أ دوكتور ماتديش عليه راه واقيلا مرافق معا دوك اللحايا الله ينجيك منهم

ـ لا أ سيد الحاج لا.. كريم ماشفت منو غير الخير.. غير هو راه عيان شويا وخاصكم تديوها فيه

ـ مالو؟ قول ليا أدكتور ماتخبيش عليا.. مالو

ـ آش غادي نقوليك أ سي الحاج خاصك تاخذ المسألة فحجمها الطبيعي.. هادشي كايوقع.. قضاء و قدر.. و ماخاصكمش تحسسوه باللي شي حاجة تبدلات

ـ وا قول ا سي الطبيب راه حشيتي ليا الركابي

ـ سيد الحاج هادا مرض العصر.. وكريم

ـ واك واك

ـ صيرو بوزيتيف

ـ الله أ سيدي ربي أش هاد المصايب وحدة مورا وحدة!! الله أ ربي أشنو درت

ـ كالمي فو الحاج.. الله يخليك .. ماشي هو الأول اولا الآخر لي كايتصاب بهاد المرض

ـ شوف أ دكتور! خود فلوسي كاملين و داوي ليا ولدي الله يرحم والديك

ـ الرجوع لله أ الحاج, راه حنا غادي نديرو مجهودنا و مايكون غير لخير إن شاء الله

ـ آشمن خير بقا.. آشمن خير

ـ عافاك قول للحاجة تدوز عندي غدا إن شاء الله و ماتدير فبالك والو أ الحاج



كريم مسكين تصاب بالسيدا !.. يامات الزهو والقصاير وكل نهار معا بنت.. هاهي النتيجة
ولكن العجيب هو كريم اللي تقبل هاد الخبر بدم بارد.. فالحقيقة هاداك سميتو الإيمان القوي.. ملي جا عندو باه يقولها ليه

ـ ولدي كريم بغيت نهضر معاك

ـ كنتي عند دكتور؟

ـ أيه أ ولدي داكشي علاش بغيت نهضر معاك

ـ بلا ماتعذب راسك أ بابا.. راني عارف كلشي

ـ شكون قالها ليك؟

ـ الدكتور ملي طلب مني نعاود التحاليل فهمت كلشي.. وكنت حاس براسي قبل مايقولها ليا

ـ وعلاش أولدي ماحافظتيش على راسك؟ منين جاك هاد الويل؟ فين كان عقلك

ـ هذا قضاء و قدر أ بابا! ولكن هو فالحقيقة عقاب ليا و ليك و لينا كاملين

ـ آش هاد الهضرة أ ولدي؟

ـ هادي هي الحقيقة أ بابا.. نتا بابا بالصح ولكن ماكانعرفكش.. كانعرف بالشوف.. ماكانعرفكش كإنسان.. كانقرا خبارك فالصحافة وحنا عايشين فنفس الدار.. ماعمرك بستيني فوجهي.. ماعمرك سولتيني فين غادي و فين جاي.. ماعمرك عرفتي حتى فاينا قسم كانقرا.. فين عمرك جلستي معايا أنا و سارة و سولتينا آش خاصنا؟ سارة مسكينة حتى هيا لي ضيعات شبابها و شرفها بسببا تربيتكم لينا.. كل ما كان كايهمك هو الفلوس و المشاريع.. ها النتيجة أ بابا.. المشروع الكبير لي كان خاصك تسثمر فيه هاهو غادي يموت.. و مابقاش عندﮎ أ بابا حتى الجهد والا الخاطر باش تعاود مشروع بحالو .. عيتي بالجري مورا الفلوس و ليزافير والمناصب والإمتيازات.. و النتيجة من بعد هاد السنين كلها زيرو أ بابا.. ما خليتيش الخلف.. وماضمنتي لا دنيا ولا آخرة.. وفلوس الحرام كايمشيو فالحرام

ـ صافي سكت سكت باراكا

ـ أنا غادي نسكت أبابا.. غادي نسكت بصفة نهائية.. يمكن تتوحش صوتي شي نهار ولكن ماغاديش تلقاني.. غادي نكون لهيه فالدار الآخرة مرتاح إذا غفر ليا الله ذنوبي.. و نتوما؟ آش غادي تديرو؟ باش غادي تقابلو مولاكم؟ نتا و ماما و سارة؟

ـ كريم ولدي.. ماغاديش نخليك تموت.. لابقيت باغي لا فلوس ولا والو.. غادي نصرف عليك كل ماكانملك باش تبرا من هاد المرض

ـ ماغادي يفيد بوالو أ بابا.. السيدا ماعندها دواء.. و فلوسك أ بابا حرام حرام حرام.. و أنا مابقا قد ما فات فحياتي و ماعندي ماندير بفلوس الحرام.. هادشي لي بقا ليا فحياتي غادي نتعبد فيه الله الواحد القهار, واخا نمحي غير شويا من السيئات لي درت من نهار حليت عينيا فهاد الدنيا.. شفتي؟ لوكان الفلوس فيهم الفايدة كون داواوني من مرضي!
كون كانت فيهم الفايدة كون صلحو ما ضاع

من بعد عام بالتمام والكمال مات كريم

مات كريم مسكين.. عانا فهاد العام من آلام الأمراض.. طاح ليه شعرو.. و مشا ليه الشوف..ومع ذلك بقا مداوم على العبادات كلها بإيمان كبير و يقين بأن الله غادي يغفر ليه..وكان ديما كايتفكر قول الله عز و جل : قل يا عبادي الذين أسرفوا على أنفسهم لا تقنطوا من رحمة الله إن الله يغفر الذنوب جميعاً إنه هو الغفور الرحيم

مات كريم مسكين فعز شبابو.. من بعد ما ولى إنسان مزيان.. تقي.. من بعد ما نقذو الله من عالم الفساد و هداه للطريق المستقيم.. بغاه الله بجواره باش يبعدو من هاد الدنيا الفانية.. سبحان الله


لاإله إلا الله محمد رسول الله